Gold:தங்கம் விலையானது குறையவே குறையாதா என்று கேள்வி எழுப்புவர்களுக்கு, தொடர்ந்து வாய்ப்பே இல்ல ராஜா என்பது தான் பதிலாக உள்ளது. ஜான் ஏறினால் முழம் சறுக்கிறது என்ற வரிகளுக்கு ஏற்ப, அவ்வப்போது சிறிய அளவில் குறைந்தாலும், மீண்டும் உச்சத்தை எட்டி நின்று விடுகிறது. சர்வதேச சந்தையில் கடும் ஏற்ற இறக்கத்தில் காணப்படும் தங்கமானது, வரவிருக்கும் பணவீக்க தரவுகளுக்கு மத்தியில் மீண்டும் ஏற்றம் காணலாம் என்ற அச்சம் எழுந்துள்ளது.
விலை அதிகரிக்கலாம்!
ஏனெனில் பாதுகாப்பு புகலிடமான தங்கத்தின் தேவையை இது ஊக்குவிக்கலாம். இது முதலீட்டு ரீதியாகவும், பாதுகாப்பு ரீதியாகவும் தங்கத்தை வாங்க ஊக்குவிக்கலாம். மேற்கொண்டு அமெரிக்க அதிபர் டொனால்டு டிரம்ப் எப்போது எந்த அறிவிப்பை வெளியிடுவாறோ என்ற அச்சமும் இருந்து வருகிறது. குறிப்பாக வரி குறித்த அறிவிப்புகள் கவலையை எழுப்பியுள்ளன. இதுவும் தங்கம் விலை அதிகரிக்க முக்கிய காரணியாக அமையலாம்.
அமெரிக்காவின் நுகர்வோர் விலை குறியீடானது, வரவிருக்கும் அமெரிக்க மத்திய வங்கியின் வட்டி விகித முடிவில் முக்கிய பங்கு வகிக்கலாம். குறைந்தபட்ச வட்டி விகிதம் வட்டியில்லா முதலீடான தங்கத்தில் முதலீடுகளை குறைக்க வழிவகுக்கலாம் என்றாலும், தங்கத்தின் தேவையை ஊக்குவிக்கலாம். இது தங்கம் விலையும் அதிகரிக்க வழிவகுக்கலாம். ஆக பணவீக்கம் குறித்து முதலீட்டாளர்கள் எச்சரிக்கையுடன் இருக்க வேண்டும். சமீபத்திய பதட்டங்களுக்கு மத்தியில் குறுகிய காலத்தில் வட்டி குறைப்புக்கு சாத்தியமில்லை என்று கூறியுள்ளனர். ஆக வரவிருக்கும் மார்ச் 18 – 19 கூடத்தில் வட்டி விகிதத்தில் பெரிய மாற்றம் ஏதும் இருக்காது என எதிர்பார்க்கலாம்.
அதிகரிக்கும் வர்த்தக பதற்றம்
வட்டி விகிதத்தில் மாற்றம் இல்லை என்றாலும், அமெரிக்காவுக்கு இறக்குமதி செய்யப்படும் அலுமினியம் மற்றும் இரும்பு-க்கு 25% வரியை சமீபத்தில் விதித்தது. இது சர்வதேச நாடுகளிடையே வர்த்தக போரை உருவாக்கும் என்ற அச்சம் எழுந்துள்ளது. அமெரிக்காவின் இந்த அறிவிப்பானது கனடா, மெக்சிகோ மற்றும் சீனா இடையே பெரும் பதற்றத்தையும் ஏற்படுத்தியுள்ளது. இது மேற்கொண்டு வர்த்தக பதற்றத்தை அதிகரிக்க வழிவகுக்கலாம். இது சர்வதேச பொருளாதாரத்தில் பிரச்சனையை ஏற்படுத்தலாம். இதுவும் பாதுகாப்பு புகலிடமான தங்கம் விலையில் அதிகரிக்க காரணமாக அமையலாம்.
மேற்கொண்டு தங்கம் விலையில் முக்கிய காரணியாக பார்க்கப்படும் டாலர் மதிப்பு, அமெரிக்க பத்திர சந்தை என பலவும் கவனத்தில் கொள்ள வேண்டிய காரணிகளாக பார்க்கப்படுகிறது. அமெரிக்க அதிபர் டிரம்பின் நடவடிக்கைகளால், டாலரின் மதிப்பு மேலும் வலுப்பெறலாம் என்ற யூகமும் இருந்து வருகிறது. இதுவும் தங்கம் விலையில் பாதிப்பை ஏற்படுத்தலாம். மேற்கொண்டு உக்ரைன் ரஷ்யா பிரச்சனைக்கு தற்காலிக ஒப்பந்தம் ஏற்பட்டிருந்தாலும், அதற்கு நிரந்தர தீர்வு காணும் பட்சத்தில், அது தங்கம் விலை சரிய காரணமாக இருக்கலாம். ஆனால் தற்போதைக்கு சாத்தியமான ஒன்றாக இல்லை.
இந்திய நிலவரம்?
சர்வதேச சந்தையின் ஏற்றத்தின் மத்தியில், இந்திய பியூச்சர் சந்தையிலும் தங்கம் விலை அதிகரித்து காணப்படுகிறது. ஆபரண சந்தையிலும் ஏற்றம் கண்டுள்ளது. நீண்ட கால அடிப்படையில் தற்போது வரையில் விலை அதிகரிக்கவே பல்வேறு காரணிகளும் சாதகமாக உள்ளன. ஆக விலை குறையும் போதெல்லாம் வாங்கி வைக்கலாம். எப்படி இருப்பினும் சரியான ஆலோசனையுடன் போர்ட்போலியோவில் சேர்ப்பது நல்லது.
சென்னையில் தங்கம் விலை
22 கேரட் – 1 கிராம் – ரூ.8,065
1 சவரனுக்கு – ரூ.64,520
24 கேரட் – 1 கிராம் – ரூ.8,798
10 கிராமுக்கு – ரூ.87,980
வெள்ளி விலை – கிராமுக்கு – ரூ.100
Disclaimer: All the above articles and news are published for informational purposes. It is important to plan with the advice of proper experts and not to make final decisions regarding investment or savings based on this. The management is not responsible for any such planning based on this.
முதலீடு செய்வதற்கு முன்பு செபி பதிவு முதலீட்டு ஆலோசகர்களிடம் கலந்து ஆலோசித்த பின்னரே இறுதி முடிவு எடுக்க வேண்டும். அதுவே லாபகரமான முதலீட்டுக்கு உதவும்.
